Ka përfunduar seanca në Gjykatën e Posaçme kundër Korrupsionit dhe Krimit të Organizuar (GJKKO) për ish-ministrin e Shëndetësisë, Ilir Beqaj, në kuadër të dosjes së njohur si “Sterilizimi”.
Ilir Beqaj mbërriti në sallën e gjyqit i shoqëruar nga forcat e sigurisë dhe me pranga në duar. Para nisjes së seancës, prangat iu hoqën dhe ai u ul pranë avokatit të tij mbrojtës, Ermal Yzeiraj.
Gjatë seancës, Prokuroria paraqiti qëndrimet e saj lidhur me 22 kërkesat e depozituara nga mbrojtja e Beqajt. Nga ana tjetër, ish-ministri kundërshtoi pretendimet e akuzës, duke deklaruar se gjatë fazës së hetimeve i janë cenuar të drejtat procedurale.
Beqaj pretendoi se dokumentet që nuk mbajnë firmën e tij nuk mund të përdoren si prova kundër tij dhe mohoi përgjegjësinë për akuzat e ngritura.
“Faleminderit organit të akuzës për përgjigjet. Fillimisht më duhet të them se organi i akuzës pranoi që, në fazën e hetimeve, m’i ka cenuar hapur të drejtat e mia procedurale. Sot e kam të vështirë të bëj mbrojtjen”, u shpreh ai.
Ish-ministri kritikoi gjithashtu mënyrën se si, sipas tij, janë zhvilluar hetimet, duke deklaruar se “u bënë rreth tre vjet që merrem me këtë çështje” dhe se “Kodi është bërë i pavlerë”, ndërsa akuzoi organin e akuzës për shkelje të të drejtave procedurale.
Ai tha se nuk beson se mund të ketë “vjedhje para se të nënshkruhet kontrata”, duke shtuar se një dokument pa nënshkrimin e tij nuk mund të përdoret si provë ndaj tij.
Në fund të seancës, avokati mbrojtës Ermal Yzeiraj kërkoi kohë për të shqyrtuar materialet dhe përgjigjet e paraqitura nga Prokuroria.
Trupi gjykues pranoi kërkesën dhe vendosi që seanca e radhës të zhvillohet më 11 shtator.