Kryeministri Edi Rama, së bashku me ministren e Ekonomisë, Kulturës dhe Inovacionit, Delina Ibrahimaj, morën pjesë këtë të premte në prezantimin e programit kombëtar “Dyfisho sipërmarrjen tënde”, një nismë e qeverisë që synon të mbështesë bizneset e vogla dhe të mesme në zhvillimin e tyre.
Gjatë aktivitetit, ministrja Ibrahimaj theksoi rëndësinë e rritjes së aksesit në financim për sipërmarrjet, duke nënvizuar se qeveria synon të fuqizojë këtë sektor, i cili ka një rol kyç në ekonominë shqiptare.
“Kredia është rritur për bizneset. Ka pasur më shumë financime në dispozicion. Vetëm 26 për qind e kredisë për biznese shkon për ndërmarrjet e vogla dhe të mesme. Ne duam t’i mbështesim këto ndërmarrje, sepse përbëjnë mbi 88 për qind të punësimit. Kanë një kontribut tepër të rëndësishëm në ekonomi dhe duhet të fuqizohen si nga ana teknologjike, ashtu edhe ekonomike”, u shpreh Ibrahimaj.
Ajo u bëri thirrje bizneseve që të informohen pranë bankave për programin e ri.
“Të gjitha bizneset të drejtohen në banka dhe të pyesin për nismën ‘Dyfisho sipërmarrjen tënde’. Është një program me shumë leverdi”, deklaroi ministrja.