Kryeministri Edi Rama mori pjesë në eventin “Dyfisho sipërmarrjen tënde”, ku prezantoi programin e ri të mbështetjes për sipërmarrjet e vogla dhe të mesme, duke theksuar se bizneset e mëdha nuk do të jenë përfituese të kësaj skeme.
Gjatë fjalës së tij, Rama vlerësoi rolin e Ministrisë së Bujqësisë në zbatimin e projektit, duke nënvizuar se zhvillimi rural mbetet një ndër prioritetet e qeverisë, me fokus të veçantë te nxitja e agropërpunimit.
“Ministri i Bujqësisë dhe ministria janë të rëndësishëm për projektin. Kur vjen puna te zhvillimi rural, qeveria ka prioritet të nxisë sa më shumë agropërpunimin. Në këtë sektor kemi potencial të madh dhe ende shumë hapësira të pazhvilluara”, u shpreh Rama.
Ai bëri të ditur se një element i ri i programit është mbështetja për shoqëritë e përbashkëta në fshat dhe në bashki, ndërsa pjesë e procesit do të jetë edhe Ministria e Kulturës dhe Turizmit.
Kryeministri sqaroi se programi është konceptuar ekskluzivisht për sipërmarrjet e vogla dhe të mesme, ndërsa bizneset e mëdha nuk do të kenë akses në të. Sipas tij, për këto të fundit ekziston “Paketa e Maleve”, e cila mund të ndërthuret me linjat e kredisë.
“Programi ka një tavan prej 2 milionë eurosh dhe do të ketë mbështetjen tonë. Do të ngremë një Task Force për të analizuar periodikisht rezultatet dhe për të identifikuar rastet kur programi do të ketë nevojë për ndërhyrje”, theksoi Rama.