Një person ka mbetur i plagosur si pasojë e një atentati me armë zjarri, të ndodhur mbrëmjen e së premtes në lagjen nr. 4 të Sarandës.
I plagosuri është identifikuar si Thimjo Rubati, i njohur edhe me emrin Sander Rubati, 50 vjeç. Ai u transportua me urgjencë në Spitalin e Sarandës, ku sipas informacioneve paraprake ndodhet në gjendje të rëndë dhe është futur menjëherë në sallën e operacionit.
Rubati është një emër i njohur për autoritetet ligjzbatuese. Ai ka precedentë penalë për trafik klandestin emigrantësh, kontrabandë, armëmbajtje pa leje dhe rezulton i skeduar edhe për trafik të mjeteve motorike. Në vitin 2002 është arrestuar për trafikim të të miturve, ndërsa në vitin 2012 për rrëmbimin e një 16-vjeçareje.
Pas ngjarjes, Policia ka blinduar hyrje-daljet e Sarandës dhe ka ngritur pika kontrolli në akset kryesore, ndërsa vijojnë kërkimet intensive për identifikimin dhe kapjen e autorit ose autorëve të të shtënave.