Qeveria izraelite ka ndërmarrë një hap të pazakontë që mund të lejojë përdorimin e krokodilëve në funksione sigurie, përfshirë edhe ruajtjen e burgjeve. Vendimi vjen pas një ndryshimi në klasifikimin ligjor të këtyre zvarranikëve, të miratuar nga Ministria e Mbrojtjes së Mjedisit.
Sipas vendimit të ri, krokodilët e Nilit nuk do të konsiderohen më thjesht kafshë të egra, por do të klasifikohen si “kafshë të egra të kultivuara”. Ky status u krijon mundësi institucioneve shtetërore të autorizuara t’i mbajnë dhe t’i përdorin ato për qëllime sigurie, me miratimin e autoriteteve përkatëse dhe në përputhje me kushtet e përcaktuara nga legjislacioni mjedisor.
Një nga institucionet që mund të përfitojë nga ky ndryshim është Shërbimi i Burgjeve i Izraelit, i cili është në varësi të Ministrisë së Sigurisë Kombëtare.
Propozimi i Ben-Gvir
Ideja për përdorimin e krokodilëve u hodh fillimisht në fund të vitit të kaluar nga ministri i Sigurisë Kombëtare, Itamar Ben-Gvir, i cili propozoi vendosjen e tyre rreth burgut Ketziot, në jug të Izraelit, ku mbahen kryesisht të burgosur palestinezë të dënuar për çështje sigurie.
Sipas mediave izraelite, qëllimi ishte krijimi i një pengese shtesë për të parandaluar tentativat e arratisjes.
Në një postim të publikuar së fundmi në rrjetet sociale, Ben-Gvir ironizoi mundësinë e arratisjes nga burgu, duke shkruar: “Po mendon të arratisesh? Mendoje edhe një herë.” Postimi shoqërohej me një imazh të krijuar me inteligjencë artificiale, ku ministri shfaqej pranë një krokodili të lidhur me zinxhir.
Propozimi është krahasuar nga mediat me qendrën amerikane të ndalimit të emigrantëve në Florida, e njohur me nofkën “Alligator Alcatraz”, për shkak të pranisë së aligatorëve në zonat përreth.
Kundërshtime nga ekspertët
Nisma ka hasur në kritika nga Autoriteti Izraelit i Natyrës dhe Parqeve, i cili kundërshton përdorimin e kafshëve të egra për funksione sigurie.
Institucioni argumenton se krokodilët duhet të mbahen vetëm për qëllime shkencore, edukative ose konservimi dhe jo si pjesë e infrastrukturës së burgjeve.
Autoriteti ka kujtuar gjithashtu raste të mëparshme, kur krokodilë të rritur në robëri janë arratisur në natyrë, duke krijuar rrezik për popullsinë.
Edhe brenda vetë sistemit penitenciar, ideja nuk është pritur me entuziazëm. Sipas raportimeve të Channel 13, disa zyrtarë të Shërbimit të Burgjeve e kanë cilësuar propozimin si “qesharak”, duke vënë në dyshim realizueshmërinë dhe efektivitetin e tij.
Ndërkohë, deri tani nuk është marrë një vendim përfundimtar për vendosjen e krokodilëve në ndonjë institucion penitenciar, por ndryshimi i klasifikimit ligjor krijon bazën që një masë e tillë të jetë e mundur në të ardhmen, nëse miratohet nga autoritetet kompetente.