Një turiste rreth 30 vjeçe nga Finlanda u transportua me urgjencë në Spitalin Rajonal të Vlorës, pasi ka shfaqur probleme të rënda shëndetësore gjatë një zhytjeje të zhvilluar paraditen e sotme.
Sipas informacioneve paraprake, viktima ka hasur probleme me furnizimin me oksigjen gjatë kohës që ndodhej nën ujë, çka ka bërë që të nxirrej menjëherë në sipërfaqe.
Në vendngjarje kanë mbërritur shërbimet e Policisë dhe autoambulanca, ndërsa turistja është transportuar me urgjencë drejt Spitalit Rajonal të Vlorës. Pavarësisht përpjekjeve të mjekëve, ajo nuk ka mundur të mbijetojë dhe është konstatuar pa shenja jete.
Identiteti i viktimës nuk është bërë ende publik, ndërsa autoritetet po kryejnë veprimet procedurale dhe vijojnë hetimet për të zbardhur shkaqet dhe rrethanat e plota të ngjarjes.