Ashtu siç ishte paralajmëruar, një stuhi e fuqishme ka mbërritur në Shqipëri dhe vendet fqinje, duke sjellë erëra të forta, reshje shiu dhe shkarkesa elektrike.
Mbrëmjen e së martës, era e fortë përfshiu qytetin e Vlorës, duke shkaktuar probleme në zona të ndryshme. Qytetarët dhe pushuesit u larguan nga bregdeti për shkak të rrezikut nga rrëzimi i pemëve dhe objekteve të ndryshme.
Në zonën e Lungomares, bizneset u detyruan të mblidhnin çadrat dhe karriget, pasi era e fuqishme vështirësoi zhvillimin normal të aktivitetit.
Ndërkohë, edhe në qarkun e Kukësit reshjet e shiut, erërat me intensitet mesatar dhe shkarkesat elektrike i dhanë fund valës së të nxehtit.
Stuhia ka goditur edhe Kosovën, duke shkaktuar dëme materiale në disa komuna. Ndër zonat më të prekura janë fshatrat e komunës së Suharekës, përfshirë Vraniqin, ku erërat e forta kanë dëmtuar banesa, biznese dhe sipërfaqe bujqësore.
Kushte të vështira atmosferike janë regjistruar edhe në Maqedoninë e Veriut. Në Shkup, erërat e forta kanë dëmtuar çati banesash, kanë këputur kabllo elektrike dhe kanë rrëzuar pemë, duke krijuar probleme në disa pjesë të qytetit.
Deri më tani, në Shqipëri nuk raportohen dëme të konsiderueshme, ndërsa në Kosovë pasojat e stuhisë mbeten të shumta.