Policia e Shtetit ka dalë me një njoftim zyrtar mbrëmjen e së enjtes, 23 korrik, lidhur me masat dhe kujdesin që duhet ndërmarrë nga kushtet atmosferike të paqëndrueshme.
Kështu, në njoftim thuhet se duhen shmangur lundrimi dhe peshkimi i mjeteve të vogla përgjatë vijës bregdetare Dhërmi-Himarë-Sarandë.
Gjithashru, blutë kanë kërkuar që qytetarët të tregojnë kujdes, përfshirë dhe shoferët, e të respektojnë rregullat e qarkullimit rrugor për të shmangur çdo rrezik të mundshëm.
Ndërkohë, këmbësorët këshillohen të tregojnë vëmendje të shtuar gjatë lëvizjes, veçanërisht në rast reshjesh apo lagështie në rrugë.
Njoftimi:
Në bazë të parashikimeve për përkeqësimin e kushteve hidrometeorologjike detare dhe atmosferike, Policia e Shtetit njofton se, duke filluar nga mesdita e datës 24.07.2026 deri në paraditen e datës 25.07.2026, mjetet e vogla lundruese dhe mjetet e peshkimit që synojnë të operojnë jashtë Gjirit të Vlorës dhe Gjirit të Sarandës, në det të hapur dhe përgjatë vijës bregdetare Dhërmi–Himarë–Sarandë, të shmangin daljet në det, për shkak të kushteve të pafavorshme hidrometeorologjike gjatë këtij harku kohor.
Drejtuesit e këtyre mjeteve lundruese duhet të tregojnë kujdes të shtuar, të marrin në konsideratë përkeqësimin e kushteve të motit dhe të shmangin çdo dalje në det që mund të rrezikojë sigurinë e tyre dhe të personave në bord.
Po ashtu, nisur nga parashikimet për përkeqësimin e kushteve atmosferike gjatë ditës së nesërme, Policia e Shtetit apelon për kujdes të shtuar nga qytetarët dhe të gjithë drejtuesit e automjeteve dhe motomjeteve, duke respektuar rregullat e qarkullimit rrugor, kufijtë e shpejtësisë, distancën e sigurisë dhe duke shmangur manovrat e rrezikshme.
Këmbësorët këshillohen të tregojnë vëmendje dhe kujdes të shtuar gjatë lëvizjes, veçanërisht në kushtet e reshjeve apo lagështirës në rrugë.
Policia e Shtetit apelon për të gjithë përdoruesit e mjeteve të vogla lundruese, mjeteve të peshkimit dhe të gjithë përdoruesit e rrugës që të tregojnë kujdes maksimal, jo vetëm gjatë këtij harku kohor, por në vijimësi, me qëllim rritjen e parametrave të sigurisë së jetës.