Siç ishte paralajmëruar, protestuesit mbërritën para Kuvendit rreth orës 09:00, në pritje të nisjes së seancës plenare.
Edhe sot protesta u shoqërua me tensione dhe përplasje mes protestuesve dhe efektivëve të policisë, të cilët kishin krijuar një kordon sigurie për të penguar afrimin e tyre pranë godinës së Parlamentit.
Vezët dhe domatet e marra nga protestuesit, këtë herë u hodhën në drejtim të efektivëve të policisë, pasi deputetët arritën të hynin në Kuvend nën masa të shtuara sigurie.
Edhe seanca plenare nisi me tensione, pas kalimit për shqyrtim me procedurë të përshpejtuar të projektligjit për huanë prej 302 milionë dollarësh nga SHBA për Shqipërinë në fushën e mbrojtjes.
Partia Demokratike e kundërshtoi procedurën, duke pretenduar se nuk ishte njohur me përmbajtjen e marrëveshjes. Nga ana tjetër, kryetari i Grupit Parlamentar të PS-së, Niko Peleshi, deklaroi se dokumenti është në dispozicion të deputetëve dhe se nuk do të kalojë për miratim pa u studiuar më parë.
Seanca u ndërpre për të vijuar sërish gjatë ditës, në orën 15:00.
Pas përfundimit të protestës, pjesëmarrësit u drejtuan pranë Komisariatit nr. 1, ku ishin shoqëruar disa prej protestuesve nga policia, mes tyre edhe organizatori Arben Kola.