Sekretariati i Etikës ka vendosur përjashtimin me 60 ditë të deputetit Agron Shehaj, pasi ai mori marrëveshjen konfidenciale me SHBA-në dhe u largua me të nga salla “Gerti Bogdani”.
Deputetët e Partisë Demokratike votuan kundër masës disiplinore.
Ulsi Manja deklaroi se rasti i Shehajt është i përsëritur dhe se ndaj tij janë marrë edhe më herët masa disiplinore nga Sekretariati i Etikës.
“Rasti i tij është i përsëritur, Sekretariati i Etikës ka marrë edhe herë të tjera masa disiplinore ndaj Agron Shehajt. Rasti i djeshëm është i paprecedentë, nuk ka ndodhur ndonjëherë që të jetë fshirë vija e respektit reciprok”, u shpreh Manja.
Ai sqaroi se periudha e përjashtimit nuk përfshin kohën kur Kuvendi është i shpërndarë gjatë pushimeve verore.
Manja bëri të ditur gjithashtu se ndaj Shehajt do të ketë një referim në Prokurori për shkelje të konfidencialitetit, pasi nxori materialin e klasifikuar jashtë ambienteve të përcaktuara nga Kryetarja e Kuvendit.