Tre zjarrfikës kanë humbur jetën në dy ngjarje të ndryshme gjatë operacioneve për shuarjen e zjarreve që po përfshijnë disa rajone të Greqisë.
Sipas Shërbimit Zjarrfikës grek, dy efektivë, 25 dhe 58 vjeç, humbën jetën në zonën e Rethymnos, në ishullin e Kretës. Të dhënat paraprake tregojnë se ata po ndërhynin në një zonë të izoluar kur u rrethuan nga flakët, ndërsa më vonë autoritetet gjetën automjetin e tyre tërësisht të djegur.
Dy zjarrfikës të tjerë mbetën të plagosur gjatë operacionit dhe po marrin trajtim në spital. Sipas autoriteteve, ata ndodhen jashtë rrezikut për jetën.
Viktima e tretë u regjistrua në zonën e Gjithios, në Peloponez. Bëhet fjalë për shefin e zyrës rajonale të zjarrfikësve në Lakoni, i cili, sipas Policisë, humbi jetën nga një atak kardiak i shkaktuar nga lodhja dhe sforcimi fizik gjatë përpjekjeve për të përballuar flakët që kanë përfshirë qindra hektarë tokë.
Ndërkohë, situata me zjarret mbetet kritike në Peloponez, Paros, Mitilini dhe Kretë, ku flakët janë përhapur në një front prej më shumë se 15 kilometrash mes Rethymnos dhe Hanias.
Në terren vijojnë operacionet me pjesëmarrjen e qindra zjarrfikësve dhe vullnetarëve, ndërsa temperaturat rreth 40 gradë Celsius dhe erërat e forta, që arrijnë deri në 8 ballë të shkallës Bofor, po e vështirësojnë ndërhyrjen.
Në zonën e Hanias, rreth 2 mijë turistë dhe banorë janë evakuuar nga deti me anije dhe skafe private, pasi rrugët tokësore nuk ofronin kushte të sigurta largimi.
Autoritetet greke paralajmërojnë se rreziku mbetet i lartë edhe gjatë 48 orëve të ardhshme. Mbrojtja Civile u ka bërë thirrje qytetarëve të tregojnë kujdes maksimal dhe të zbatojnë çdo udhëzim të autoriteteve për të garantuar sigurinë e tyre.