Kapiteni i një cisterne nafte ka raportuar se ka dëgjuar dy shpërthime teksa anija po kalonte në Ngushticën e Hormuzit, pranë brigjeve të Sulltanatit të Omanit. Njoftimi u bë nga Zyra Britanike e Operacioneve të Tregtisë Detare (UKMTO), e cila monitoron sigurinë e lundrimit në rajon.
Sipas UKMTO, incidenti ndodhi rreth 9 milje detare (16 kilometra) në juglindje të Kumzarit, në Oman. Autoritetet bënë të ditur se ekuipazhi dhe anija janë të sigurt, ndërsa nuk është raportuar asnjë dëmtim i mjetit lundrues apo ndotje e mjedisit.
Ngjarja vjen në një periudhë tensionesh të larta në Ngushticën e Hormuzit, një nga rrugët detare më të rëndësishme për transportin global të naftës. Ndërkohë, Omani po zhvillon bisedime me Iranin lidhur me menaxhimin e përbashkët të kësaj rruge strategjike.
Sipas raportimeve, Irani ka vendosur kufizime të rrepta për lëvizjen e anijeve në ngushticë pas përshkallëzimit të konfliktit në Lindjen e Mesme, duke pretenduar se mjetet detare duhet të ndjekin korridorin e autorizuar pranë brigjeve iraniane.