Policia Kufitare e Shkodrës ka finalizuar operacionin e koduar “Halfway”, duke goditur një rast të dhënies ndihmë emigrantëve për kalim të paligjshëm të kufirit.
Në kuadër të operacionit janë arrestuar në flagrancë dy shtetas, të cilët dyshohet se transportonin kundrejt pagesës 15 emigrantë nga vende të Afrikës, me qëllim kalimin e paligjshëm drejt Malit të Zi.
Në pranga kanë rënë shtetasit E. A., 22 vjeç, dhe M. F., 19 vjeç, të dy banues në Fushë-Arrëz. Ata u kapën nga shërbimet e Policisë Kufitare në fshatin Vukpalaj, pranë kufirit me Malin e Zi, teksa transportonin emigrantët me një automjet tip furgon.
Gjatë operacionit, policia sekuestroi edhe automjetin e përdorur për transportimin e emigrantëve.
Sipas Policisë Kufitare, operacioni u zhvillua pas informacioneve të siguruara në rrugë operative dhe në vijim të kontrolleve intensive për parandalimin dhe goditjen e rasteve të ndihmës për kalim të paligjshëm të kufirit.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.