Një pemë rreth 8 metra e gjatë është gjetur brenda kolektorit kryesor të ujërave të zeza në Bulevardin e Kasharit, duke zbuluar shkakun e një problemi që përsëritej prej më shumë se një dekade në zonë.
Kryeministri Edi Rama ka publikuar pamje nga ndërhyrja, ku shihet nxjerrja e trungut nga tubacioni. Pema u zbulua përmes një kamere speciale nëntokësore, e cila mundësoi identifikimin e pengesës brenda kolektorit.
Problemi shfaqej sa herë kishte reshje. Ujërat e zeza dilnin në bulevard dhe përhapeshin edhe në lagjet përreth, duke krijuar të njëjtën situatë prej vitesh.
Gjatë ndërhyrjes, trungu i pemës u nxor nga kolektori dhe tubacioni u çlirua nga pengesa.
Sipas Ramës, pema ishte lënë brenda tubacionit gjatë ndërtimit të kolektorit, në vend që të largohej nga kantieri. Përmasat e saj kishin krijuar një pengesë të madhe në sistemin e kanalizimeve.
Pas pastrimit të kolektorit, ndërhyrja synon të shmangë përsëritjen e problemit të ujërave të zeza në Bulevardin e Kasharit dhe zonat përreth gjatë reshjeve.