Dy faza të tjera të operacionit të koduar “Siguria” janë finalizuar nga shërbimet e Stacionit të Policisë Plazh në Durrës, në kuadër të masave për garantimin e rendit dhe sigurisë gjatë sezonit turistik.
Si rezultat i kontrolleve, patrullimeve dhe bashkëpunimit me qytetarët, Policia goditi një rast të armëmbajtjes pa leje dhe parandaloi një vjedhje.
Për armëmbajtje pa leje, u arrestua në flagrancë shtetasi suedez O. K., 29 vjeç. Gjatë kontrollit në çantën marsup që mbante me vete, Policia gjeti një armë zjarri, pistoletë, me karikator të mbushur me fishekë, të cilën e posedonte pa leje.
Në një tjetër rast, u arrestua në flagrancë pranë një banese shtetasi D. P., 24 vjeç, i cili dyshohet se kishte tentuar të vidhte një kasafortë murale.
Nga hetimet e kryera për këtë rast u identifikuan edhe dy bashkëpunëtorët e tij, shtetasit V. K., 38 vjeç dhe S. I., 26 vjeç.
Si rezultat i veprimeve të shpejta policore, u bë e mundur ndalimi i shtetasit V. K., ndërsa vijon puna intensive për kapjen e shtetasit S. I.
Policia bën me dije se kontrollet dhe patrullimet do të vijojnë në kuadër të masave të posaçme për sezonin turistik.