Një automjet i Policisë së Kosovës pranë atij të KFOR-it mbi urën e Ibrit ka qëndruar edhe gjatë ditës së martë, ndërsa misioni paqeruajtës i NATO-s ka konfirmuar nisjen e “tranzicionit gradual të pranisë” së tij të përhershme nga ura kryesore mbi lumin Ibër në Mitrovicë.
Ura, e cila prej vitesh simbolizon ndarjen dhe bashkimin e qytetit, është e kalueshme nga qytetarët në këmbë, të cilët mund të lëvizin lirshëm nga pjesa veriore në atë jugore dhe anasjelltas.
Megjithatë, ura vijon të jetë e bllokuar për automjetet, pavarësisht një përpjekjeje për hapjen e saj rreth dy vite më parë, e cila nuk u realizua.
Eksperti i sigurisë, Nuredin Ibishi, e ka cilësuar të arsyeshëm tranzicionin e KFOR-it, duke argumentuar se tashmë janë krijuar kushtet për kalimin gradual të përgjegjësive te Policia e Kosovës.
Sipas tij, Policia e Kosovës ka dëshmuar se është në gjendje të kontrollojë situatën, faktor që ka ndikuar edhe në vendimin e faktorit ndërkombëtar për këtë tranzicion.
KFOR-i ka sqaruar se procesi do të zhvillohet gradualisht dhe do të varet nga kushtet në terren.
“Tranzicioni do të jetë gradual, në varësi të kushteve dhe po koordinohet ngushtë me të gjithë aktorët relevantë, përfshirë përfaqësuesit e institucioneve në Kosovë dhe të organizatave ndërkombëtare, si dhe me përfaqësuesit e Policisë së Kosovës dhe Misionit të Bashkimit Evropian për Sundimin e Ligjit në Kosovë (EULEX)”, thuhet nga KFOR-i.
Ura e Ibrit u bllokua në vitin 1999 dhe me kalimin e viteve u shndërrua në simbol të ndarjes mes shqiptarëve dhe serbëve në Mitrovicë. Në këtë zonë kanë ndodhur edhe një pjesë e tensioneve ndëretnike ndër vite.
Ndarja administrative e Mitrovicës në dy komuna u parashikua edhe nga Plani i Ahtisaarit, mbi bazën e të cilit Kosova shpalli pavarësinë në vitin 2008.
Aktualisht, Mitrovica është e ndarë zyrtarisht në dy komuna: Mitrovica e Veriut, me shumicë serbe, dhe Mitrovica e Jugut, me shumicë shqiptare.