Partia Demokratike e Kosovës ka ndërmarrë një tjetër aksion politik këtë të enjte, duke bllokuar hyrjen e Qeverisë së Kosovës. Deputetët e PDK-së akuzuan Albin Kurtin dhe ministrat e tij se kanë “uzurpuar” zyrat e shtetit dhe po mbajnë peng funksionimin institucional të vendit.
Përfaqësues të PDK-së paralajmëruan se do të përdorin çdo mjet politik për rikthimin e, siç thanë, rendit demokratik dhe kushtetues.
“Ky njeri nuk është kryeministër. Është një deputet zaptues. Është një deputet uzurpator, i cili e ka uzurpu zyrën e kryeministrit, i cili merr vendime në kundërshtim me Kushtetutën e Kosovës, në kundërshtim me ligjin për qeveri. Prandaj, do të bëjmë çdo gjë të mundur që ta rikthejmë rendin kushtetues”, u shprehën nga PDK-ja.
Minuta më pas, deputetët u zhvendosën në hollin e Kuvendit, ku dorëzuan kërkesën për mbajtjen e seancës konstituive të premten në orën 11:00.
“Ne jemi deputetë të betuar dhe këtë funksion po na e pamundëson ta ushtrojmë VV-ja. Në emër të PDK-së i bëj thirrje Albin Kurtit që ta lejojë Avni Deharin ta thërrasë mbledhjen për seancën. Kushtetuta e Kosovës nuk është statuti i LVV-së. Kushtetuta është akt të cilit duhet t’i nënshtrohet çdo aktivitet politik”, deklaruan përfaqësuesit e PDK-së.
Aksionet e PDK-së deri tani janë mbështetur vetëm nga Aleanca, ndërsa Lidhja Demokratike e Kosovës ka zgjedhur të distancohet.
Nga ana tjetër, Lëvizja Vetëvendosje deklaron se, nëse nuk ka marrëveshje politike për zgjedhjen e presidentit, mbajtja e seancës konstituive do të ishte humbje kohe. Përplasjet mes partive politike po e bëjnë gjithnjë e më të largët një zgjidhje për ngërçin institucional në Kosovë.