Ish-presidentja e Kosovës, Vjosa Osmani, ka folur për takimet që ajo dhe kryetari i LDK-së, Lumir Abdixhiku, zhvilluan me kryetarin e Vetëvendosjes, Albin Kurti, në kuadër të diskutimeve për një marrëveshje të mundshme politike.
LDK-ja tashmë ka vendosur të qëndrojë në opozitë, duke hequr dorë nga kërkesat për postin e kryeparlamentarit, Presidentit apo pjesëmarrjen në Qeveri. Sipas saj, Vetëvendosje mund t’i mbajë të gjitha këto pozita.
Partia ka shprehur gjithashtu gatishmërinë për të votuar një President konsensual, me kusht që ai të jetë një figurë që mbron “Republikën dhe Kushtetutën”.
E pyetur në një emision televiziv në Kosovë për takimet me Kurtin, Osmani tha se një nga dallimet kryesore mes Vetëvendosjes dhe LDK-së lidhet me mënyrën se si palët e konceptojnë rolin e Presidentit të Republikës.
“Për ne një President i Republikës duhet të ketë një përvojë, duhet të ketë qëndrime politike, jo partiake, ajo është tjetër gjë. Jo të mbajë qëndrime partiake, por të ketë qëndrime politike, të ketë njohuri politike, të ketë mundësi ta mbrojë Kushtetutën, të kryejë kompetencat e veta me nder, ta përfaqësojë vendin jashtë dhe të konsiderohet si një ekuilibër, një lloj balancuesi i pushteteve, siç e kërkon Kushtetuta e Kosovës”, tha Osmani.
Sipas saj, ky nuk ishte qëndrimi i Kurtit, pasi Vetëvendosje e shihte Presidentin si një figurë pa qëndrime politike.
“Pala tjetër, pra Vetëvendosja, më shumë e sheh si një figurë totalisht të parëndësishme, që nuk bën asgjë, një figurë simbolike që e shohim ndoshta një herë ose dy në vit. Por, nuk ka qëndrime, kështu e kemi kuptuar ne”, u shpreh ajo.
Osmani theksoi se LDK-ja nuk e ka parë Presidentin e Kosovës thjesht si një prej pushteteve, por si një institucion që shërben si balancues mes pushteteve.
Sipas saj, Vetëvendosje e shihte Presidentin si një kontrollues dhe për këtë arsye nuk dëshironte që në këtë post të ishte një person me përvojë politike, por një figurë jashtë politikës.
Megjithatë, Osmani u pajtua me idenë se tashmë është koha për të diskutuar emra konkretë, duke bërë të qartë se vota e LDK-së do të lidhet me zgjedhjen e një Presidenti konsensual që përmbush kriteret e përcaktuara nga kjo parti.