ELBASAN – Një person i ka shpëtuar një atentati mesditën e sotme në Elbasan. Ngjarja ka ndodhur rreth orës 14:50 në lokalin “Art Coffee Bistro”, në hyrje të qytetit, në lagjen “Emin Matraxhiu”.
Nga pamjet e siguruara, shihet se shënjestra e atentatit, Ermir Kërtezi , fillimisht ka qenë brenda ambienteve të lokalit, ku ka qëndruar për disa momente. Më pas është ngritur nga tavolina dhe ka dalë jashtë.
Lëvizjet e tij dyshohet se ndiqeshin nga një tjetër person, Poli Boriçi, i cili në ato momente ndodhej në të njëjtin lokal, duke pirë kafe në shoqërinë e një gruaje. Menjëherë pasi Kërtezi është ngritur dhe ka dalë jashtë për të folur në telefon, autori është ngritur dhe ka dalë pas tij, i armatosur.
Gjithçka ka ndodhur në pak sekonda. Reagimi i menjëhershëm i shënjestrës dyshohet se ka parandaluar një tragjedi, pasi Kërtezi ka arritur të largohet me shpejtësi nga vendi. Burime bëjnë me dije gjithashtu se autorit i është bllokuar pistoleta.
Pas ngjarjes, autori është larguar nga vendi, por arratisja i ka zgjatur pak, pasi është arrestuar nga uniformat blu.
Hetimet vijojnë për zbardhjen e plotë të rrethanave dhe motivit të ngjarjes.