Pesë persona janë plagosur, një prej tyre në gjendje kritike, pas një sulmi me armë zjarri pranë një godine konvikti në Universitetin Shtetëror të Virxhinias (VSU) në Shtetet e Bashkuara.
Policia mbërriti në kampus rreth orës 01:28 të së shtunës, sipas orës lokale, pas raportimeve për të shtëna me armë. Universiteti bëri të ditur se të pesë personat e plagosur u gjetën me dëmtime nga armë zjarri dhe u transportuan në spitale lokale për trajtim mjekësor.
Një nga të plagosurit ndodhet në gjendje kritike, ndërsa katër të tjerët kanë marrë plagë që nuk konsiderohen kritike për jetën. Autoritetet nuk kanë bërë ende të ditur identitetet e viktimave apo nëse ndonjë prej tyre është student i universitetit.
Sipas universitetit, ngjarja përfshiu disa persona të dyshuar. Deri tani nuk është konfirmuar nëse ka pasur arrestime. Policia lokale vijon hetimet për të përcaktuar rrethanat dhe motivin e të shtënave.
Pas incidentit, kampusi u vendos përkohësisht në izolim, ndërsa studentëve dhe stafit iu kërkua të qëndronin në ambiente të sigurta. Universiteti më vonë njoftoi se masa e izolimit ishte hequr, por një prani e konsiderueshme e forcave të rendit vijon të jetë në kampus.
Hetimin kryesor po e drejton Policia e Qarkut Chesterfield, në bashkëpunim me forca të tjera lokale të rendit dhe policinë e kampusit.
Universiteti Shtetëror i Virxhinias ndodhet rreth 32 kilometra në jug të Richmondit, kryeqytetit të shtetit të Virxhinias, dhe ka rreth 5 mijë studentë. Institucioni është një nga universitetet historikisht të personave me ngjyrë në SHBA, të njohura si HBCU, të cilat u krijuan për t’u ofruar afrikano-amerikanëve mundësi arsimimi në një periudhë kur ata përballeshin me pengesa të mëdha dhe përjashtim nga shumë institucione të arsimit të lartë.