Ministri i Shtetit për Sportin, Blendi Gonxhja, mori pjesë në ceremoninë e dorëzimit të flamurit kuqezi delegacionit shqiptar që do të përfaqësojë Shqipërinë në Lojërat Mesdhetare “Taranto 2026”.
Në fjalën e tij, Gonxhja e cilësoi këtë moment si një ditë të veçantë për sportin shqiptar, duke theksuar se bashkë me flamurin, sportistëve u dorëzohet edhe besimi i Shqipërisë te puna, përkushtimi dhe potenciali i tyre.
Ministri u shpreh se pjesëmarrja në Lojërat Mesdhetare është një mundësi e rëndësishme për të përfaqësuar vendin në arenën ndërkombëtare dhe vlerësoi sakrificën e sportistëve elitarë, të cilët pas çdo rezultati kanë vite të tëra pune, stërvitjeje, disipline dhe përkushtimi.
Gonxhja theksoi se detyra e institucioneve nuk është vetëm të kërkojnë rezultate, por të krijojnë kushtet që sportistët t’i arrijnë ato. Në këtë kuadër, ai përmendi ndryshimet e fundit në skemën e shpërblimeve për sportistët e nivelit të lartë, duke nënvizuar rritjen e mbështetjes financiare për rezultatet ndërkombëtare.