Nëntë vatra zjarri janë regjistruar në vend deri në orën 14:00 të 18 gushtit, ndërsa gjashtë prej tyre vijojnë të jenë aktive. Sipas Ministrisë së Mbrojtjes, një vatër është nën kontroll dhe dy të tjera po monitorohen.
Forcat operacionale vijojnë ndërhyrjet në terren, ndërsa Forcat e Armatosura janë angazhuar me 140 efektivë, tre helikopterë dhe dy avionë Air Tractor.
Në Dajt të Tiranës vijon operacioni për izolimin e zjarrit, ku janë angazhuar 50 efektivë të Forcave të Armatosura dhe një helikopter. Autoritetet bëjnë me dije se nuk ka rrezik për zonat e banuara.
Në Gurë-Lurë të Dibrës, zjarri është izoluar falë korridoreve të hapura, ndërsa operacioni për shuarjen e plotë vijon me 30 efektivë të Forcave të Armatosura dhe dy avionë Air Tractor.
Në Qafë Helmës, zjarri është fikur në krahun e Bulqizës, ndërsa mbetet aktiv në drejtim të Selishtës. Ndërkohë, në Bruç të Matit vijon operacioni në terren të vështirë.
Në Lufaj të Mirditës, vatra mbetet aktive, por me intensitet të ulët. Ndërhyrja vijon edhe në Tërbun të Pukës, ku janë angazhuar forca të shumta tokësore dhe ajrore. Sipas autoriteteve, edhe në këtë zonë nuk ka rrezik për banesat.
Agjencia Kombëtare e Mbrojtjes Civile vijon monitorimin e situatës në të gjithë territorin dhe koordinimin me prefekturat, bashkitë dhe strukturat e Mbrojtjes Civile, me prioritet mbrojtjen e jetës, banesave dhe pasurisë së qytetarëve.