Bilanci i zjarreve që përfshinë pyjet e Parkut Kombëtar të Lurës mbetet shqetësues, ndërsa të dhënat mbi sipërfaqen e prekur nga zjarri rezultojnë të ndryshme sipas burimeve.
Sipas të dhënave të Shtabit të Emergjencave Dibër, nga zjarri janë përshkuar rreth 600 hektarë sipërfaqe pyjore me pishë, ah dhe kullota. Zjarri ka qenë kryesisht përshkues, duke përfshirë një territor të konsiderueshëm të parkut.
Përgjatë 8 ditëve, puna për përballimin dhe izolimin e vatrave të zjarrit ka qenë e pandërprerë. Në operacionet e shuarjes janë angazhuar çdo ditë mjete ajrore, përfshirë helikopterë dhe dy avionë, si dhe më shumë se 200 forca nga MZSH, Bashkia Dibër, ADZM, drejtoritë dhe sektorë të ndryshëm, vullnetarë dhe Forcat e Armatosura.
Falë angazhimit të përbashkët dhe punës pa ndërprerje, zjarri u arrit të izolohej plotësisht, duke shmangur përhapjen e mëtejshme dhe duke mbrojtur banesat dhe zonat e banuara.
Ndërkohë, të dhënat e përftuara nga analiza satelitore paraqesin një bilanc tjetër për sipërfaqen e djegur në Lurë. Sipas tyre, sipërfaqja e prekur rezulton rreth 276 hektarë, e ndarë në:
-154.24 ha sipërfaqe me bimësi;
-78.01 ha sipërfaqe pa bimësi;
-42.54 ha sipërfaqe pyjore;
-1.23 ha pemëtore;
-0.02 ha sipërfaqe ujore.
Siç vihet re, ekzistojnë diferenca të konsiderueshme mes të dhënave të raportuara nga Bashkia Dibër dhe atyre të përftuara nga analiza satelitore. Për këtë arsye, është e rëndësishme që shifrat përfundimtare të përcaktohen mbi bazën e një vlerësimi sa më të saktë dhe të unifikuar të dëmeve të shkaktuara nga zjarri.