Gjashtë persona u lënduan kur një varkë turistike u përplas me blloqe betoni ndërsa po kthehej në portin e Agios Nikolaos në Volimes, Zakynthos, të hënën në mbrëmje, njoftoi roja bregdetare, shkruajnë mediat greke.
Incidenti ndodhi pas përfundimit të një lundrimi turistik. Mjeti lundrues transportonte 24 pasagjerë dhe dy anëtarë të ekuipazhit kur goditi blloqet ndërsa po i afrohej portit.
Katër nga të lënduarit u larguan nga porti me mjete vetjake, ndërsa dy të tjerë u dërguan me ambulancë në Spitalin e Përgjithshëm të Zakynthos-it për ndihmën e parë.
Pesë nga gjashtë të lënduarit u larguan nga spitali pasi morën trajtim mjekësor. Një burrë 60-vjeçar mbeti i shtruar në spital si masë paraprake, sipas Rojës Bregdetare.
Kombësia e të lënduarve nuk është bërë e ditur.
Kapiteni 41-vjeçar i mjetit lundrues u arrestua më pas nën dyshimin për rrezikim të sigurisë dhe shkaktim të lëndimeve trupore nga pakujdesia, si dhe për shkelje të rregulloreve që përcaktojnë përgjegjësitë e kapitenit dhe parandalimin e përplasjeve.
Varka u ndalua gjithashtu të lëvizte nga porti derisa të certifikohet siguria e saj për lundrim nga autoritetet kompetente.