Kombëtarja shqiptare U-21 do të marrë pjesë në Lojërat Mesdhetare “Taranto 2026”, ndërsa trajneri Alban Bushi ka bërë publike listën e futbollistëve që do të përfaqësojnë kuqezinjtë në këtë kompeticion ndërkombëtar.
Në një prononcim për fshf.org, Bushi ka folur për objektivat e skuadrës dhe rëndësinë e këtij turneu për një grup të ri futbollistësh. Trajneri kuqezi thekson se Shqipëria nuk do të udhëtojë vetëm për të marrë pjesë, por për të konkurruar me kundërshtarët e grupit, ku bëjnë pjesë Italia, Kosova dhe Algjeria.
“Jemi shumë të motivuar që Shqipëria do të marrë pjesë në Lojërat Mesdhetare. Për ne nuk është thjesht një turne, por një mundësi për të treguar karakterin, personalitetin dhe mentalitetin e futbollit shqiptar”, u shpreh Bushi.
Ai pranon vështirësinë e grupit, por nënvizon se objektivi është kualifikimi.
“E dimë që grupi është shumë i fortë, Italia, Kosova dhe Algjeria. I respektojmë shumë këto skuadra, por do të shkojmë atje jo thjesht për të qenë pjesëmarrës, por për t’i konkurruar ato. Objektivi ynë është që të kualifikohemi”, tha trajneri i U-21.
Bushi theksoi gjithashtu se lista e grumbulluar është kryesisht e përbërë nga futbollistë të rinj, të datëlindjeve 2006, 2007 dhe 2008, të cilët sezonin e ardhshëm pritet të jenë pjesë e ekipit Shpresa.
“Lista është pothuajse krejt e re. Është një listë me lojtarë të datëlindjeve shumë të vogla, 2006, 2007 dhe 2008 që do të jenë sezonin tjetër me ekipin Shpresa. Edhe për ata është një mundësi e mirë për të treguar vlerat e tyre dhe për t’u matur me futbollin europian”, deklaroi Bushi.
Sa i përket sfidës së parë ndaj Italisë, trajneri kuqezi pranon se koha në dispozicion për përgatitjen e skuadrës është e kufizuar, por premton angazhim maksimal nga stafi dhe futbollistët.
“Koha në dispozicion është shumë e vogël. Sot është e mërkurë dhe ne do të luajmë të shtunën me Italinë në orën 21:00. Do të mundohemi dhe ne si staf për të dhënë idetë dhe strategjitë tona se si do të luajmë ndaj Italisë”, u shpreh ai.
Bushi e konsideron çdo ndeshje si një finale dhe synon që Shqipëria të zhvillojë një paraqitje dinjitoze në këtë kompeticion.
“Për ne çdo ndeshje do të jetë si një finale. Duhet të jemi shumë dinjitoz në performancën tonë dhe kemi shumë dëshirë që ta fitojmë këtë turne”, përfundoi Alban Bushi.