Ukraina ka ndërmarrë një nga sulmet më të mëdha me dronë që prej fillimit të luftës, duke goditur veçanërisht rajonin e Moskës. Sipas autoriteteve ruse, pothuajse 800 dronë u rrëzuan mbi Krime dhe territorin rus, ndërsa 620 prej tyre dyshohet se ishin drejtuar drejt kryeqytetit. Kryebashkiaku i Moskës, Sergej Sobyanin, deklaroi se më shumë se 180 dronë u rrëzuan në zonën e kryeqytetit.
Pasojat e sulmit janë ndier kryesisht në zonat civile, ku rënia e mbetjeve të dronëve të interceptuar ka shkaktuar dëme dhe të plagosur. Në rajonin e Ramenskoye, një vajzë e vogël mbeti e plagosur pasi një dron goditi një banesë, ndërsa dy persona të tjerë u plagosën nga fragmentet e mjeteve ajrore të rrëzuara.
Dëme të konsiderueshme u raportuan edhe në disa zona të tjera. Një banesë u përfshi nga flakët në fshatin Kuznetsy, ndërsa në Pavlovsky Posad mori zjarr çatia e një pallati, i cili u evakuua plotësisht.
Në shënjestër ishte edhe një magazinë e Wildberries, gjigantit rus të tregtisë online, i cili prej disa javësh është përballur me sulme të ngjashme. Një dron dyshohet se dëmtoi një nga muret e magazinës dhe shkaktoi zjarr, por pa pasoja të konsiderueshme. Sulme u raportuan edhe në rajonin e Ryazanit, ku tre persona mbetën të plagosur.
Për herë të parë pas një periudhe të gjatë, sulmet prekën edhe rrjetin energjetik pranë Moskës. Rreth 5 mijë abonentë mbetën pa energji elektrike në zonat Likino-Dulyovo dhe Orekhovo-Zuyevo, sipas operatorit energjetik Mosoblenergo.
Sulmi ukrainas vjen në një moment kur Kievi po paralajmëron për intensifikimin e goditjeve ruse ndaj infrastrukturës energjetike të Ukrainës.
Nëse vitin e kaluar Rusia shfrytëzoi muajt e ftohtë për të shtuar presionin ndaj infrastrukturës energjetike ukrainase, këtë herë Kievi mund të tentojë një përgjigje të ngjashme, duke përdorur kapacitetet e tij në rritje për sulme me rreze të gjatë.
Edhe blogerët ushtarakë rusë kanë vënë në dukje rritjen e numrit të dronëve ukrainas të lëshuar çdo ditë. Sipas tyre, mbrojtja ajrore ruse arrin të neutralizojë shumicën e mjeteve ajrore, por përballet me vështirësi për të mbuluar një territor kaq të gjerë.
Nga ana tjetër, Ukraina vijon të përballet me probleme edhe më të mëdha në mbrojtjen ajrore, veçanërisht për shkak të mungesës së sistemeve të afta për të interceptuar raketat balistike ruse.
Një ditë më parë, Rusia ndërmori një sulm ajror ndaj fshatit Pechenihy, në rajonin e Kharkivit. Sipas autoriteteve ukrainase, nga sulmi humbën jetën 10 persona, ndërsa të paktën 18 të tjerë mbetën të plagosur.
Presidenti ukrainas Volodymyr Zelensky e dënoi sulmin në platformën X, duke e cilësuar atë si një “sulm brutal” ndaj një zone të banuar.