Gjykata e Sarandës ka lënë në burg Sokrat Vatën, i akuzuar për vrasjen e 20-vjeçarit portugez në Ksamil, Luis Miguel Varela Mendes.
Në burg janë lënë edhe Ezgi Parlak dhe Nuh Mahmutoglu, dy shtetasit turq që dyshohet se tentuan ta largonin Vatën me makinë.
Për Ildi Cekanin dhe Ardit Kasemin është vendosur masa “arrest në burg” për një afat 45-ditor.
Ndërkohë, për Luciano Seferin, Moisi Matushajn, Romeo Shehun, Murat Zhabina dhe Kristo Kosho është vendosur masa “detyrim për t’u paraqitur në policinë gjyqësore”.
Para trupit gjykues, shtetasi turk Nuh Mahmutoglu, i cili e njihte Vatën për shkak të bashkëpunimit në shoqërimin e turistëve, ka deklaruar se Vata e ka telefonuar rreth orës 06:30 dhe i ka kërkuar ta shoqëronte drejt Tiranës, duke i thënë se ishte rrëzuar nga motori.
Vata ka pretenduar se gjatë konfliktit, njëri prej turistëve kishte një thikë, të cilën ai ia ka marrë pasi e ka neutralizuar. Sipas dëshmisë së tij, në këtë moment një prej turistëve e ka goditur me shkelm në nofull, duke e rrëzuar në tokë.
Ai ka deklaruar se, ndërsa turistët kanë tentuar ta godasin sërish, ka lëvizur dorën instinktivisht për t’u mbrojtur, por nuk kujton se si e ka goditur viktimën.
“Nuk e kujtoj si e kam goditur. Isha në ‘shock’. Nuk e dija nëse ndonjëri prej tyre ishte plagosur, pasi ishin shumë. Nga ‘shock’-u jam larguar”, ka deklaruar Vata.