Ditën e sotme zhvillimet politike kanë marrë një kthesë të fortë ku presidenti Meta vendosi që të anulojë datën e zgjedhjeve më 30 qershor. Nga shumë të majtë flitet edhe për një shkarkim të kreut të shtetit nga Rama si hakmarrje.
Tirananews ka komunikuar me ekspertë të Kushtetutës të cilët nënvizojnë se ndonëse mazhoranca i ka të gjithë numrat në Kuvend, pak shanse ka që Meta të shkarkohet. Është pikërisht pika 3 e nenit 90 që e shpëton kreun e shtetit nga shkarkimi. “Presidenti i Republikës nuk ka përgjegjësi për aktet e kryera në ushtrim të detyrës së tij. Presidenti i Republikës mund të shkarkohet për shkelje të rëndë të Kushtetutës dhe për kryerjen e një krimi të rëndë. Propozimi për shkarkimin e Presidentit në këto raste mund të bëhet nga jo më pak se një e katërta e anëtarëve të Kuvendit dhe duhet të mbështetet nga jo më pak se dy të tretat e të gjithë anëtarëve të tij. Vendimi i Kuvendit i dërgohet Gjykatës Kushtetuese, e cila, kur vërteton fajësinë e Presidentit të Republikës, deklaron shkarkimin e tij nga detyra”, thuhet në Kushtetutë. Por vendi nuk ka Gjykatë Kushtetuese. Për rrjedhojë gjithçka nuk ka vlerë. / tirananews.al