Një sasi e dyshuar lënde narkotike është sekuestruar në paraburgimin 313 në Tiranë, gjatë një kontrolli të zhvilluar nga Drejtoria e Përgjithshme e Burgjeve në bashkëpunim me Agjencinë e Mbikëqyrjes në Sistemin e Ekzekutimit të Vendimeve Penale (AMSEVP).
Gjatë kontrollit në ambientet e paraburgimit është konstatuar një sasi lënde narkotike e fshehur brenda ushqimeve. Sipas burimeve, dyshohet se bëhet fjalë për hashash dhe kokainë.
Kontrolli është kryer nga strukturat e Drejtorisë së Përgjithshme të Burgjeve, së bashku me AMSEVP-në, në kuadër të kontrolleve për evidentimin e sendeve dhe materialeve të ndaluara në institucionet penitenciare.
Zbulimi i lëndës narkotike vjen në një kohë kur kontrollet në burgje dhe paraburgime kanë evidentuar edhe raste të tjera të futjes së sendeve të ndaluara.
Vetëm një ditë më parë, gjatë një kontrolli në burgun e Fushë-Krujës, u gjet një telefon celular. Ndërkohë, një tjetër telefon ishte konstatuar javën e kaluar në burgun e Peqinit.
Kontrollet kanë për qëllim evidentimin dhe parandalimin e futjes së lëndëve narkotike, telefonave celularë dhe sendeve të tjera të ndaluara në institucionet e vuajtjes së dënimit.