Presidenti ukrainas Volodymyr Zelensky ka deklaruar se ka urdhëruar Forcat e Armatosura të Ukrainës të rrisin ndjeshëm sulmet me dronë me rreze të gjatë veprimi ndaj objektivave në Rusi.
Sipas Zelenskyt, objektivi është që numri i sulmeve me dronë të arrijë në 1,000 në ditë, nga rreth 300 që kryhen aktualisht.
“Duhet të ketë më shumë: ekziston një qëllim specifik dhe ne do ta përmbushim këtë detyrë”, tha presidenti ukrainas.
Në të njëjtën kohë, sulmet ukrainase ndaj infrastrukturës energjetike ruse kanë shkaktuar probleme në sektorin e karburanteve. Prodhimi i benzinës në Rusi ra në rreth 70% të niveleve të kërkesës së brendshme në fund të gushtit, pasi disa rafineri kryesore u detyruan të pezullonin operacionet pas sulmeve me dronë.
Ukraina ka intensifikuar sulmet ndaj infrastrukturës energjetike ruse, në kuadër të përpjekjeve për të goditur të ardhurat e Moskës nga eksportet e naftës dhe për të dëmtuar kapacitetet e saj energjetike.
Mungesa e karburantit është rikthyer gjatë gushtit në disa rajone të Rusisë, pas një përmirësimi të përkohshëm në fund të korrikut, kur disa autoritete lokale nisën të lehtësonin ose të hiqnin kufizimet për shitjen e karburantit.
Prodhimi i benzinës në fund të gushtit ka rënë në nivele të ngjashme me ato të regjistruara në fillim të korrikut.
Javën e kaluar, pas sulmeve me dronë ukrainasë, disa rafineri të mëdha ruse, përfshirë impiantet në Perm, Nizhny Novgorod dhe Yaroslavl, ndaluan aktivitetin. Këto rafineri konsiderohen ndër njësitë e rëndësishme të prodhimit të benzinës në vend.