Gara për zgjedhjen e Prokurorit të ri të Përgjithshëm është shoqëruar me përplasje të forta brenda Këshillit të Lartë të Prokurorisë, ku një kërkesë për përjashtimin e një prej anëtarëve ka sjellë një zinxhir kërkesash të tjera mes anëtarëve të Këshillit.
Kandidati Ylli Pjetërnikaj ka kërkuar përjashtimin e anëtarit të KLP-së, Vatë Staka, nga procedura e përzgjedhjes, duke pretenduar konflikt interesi. Kërkesa është depozituar më 30 korrik, por ende nuk është marrë në shqyrtim nga Këshilli.
Situata u komplikua gjatë mbledhjes së së premtes, kur vetë Staka kërkoi përjashtimin e anëtarit Zeqir Hodo nga shqyrtimi i kërkesës së Pjetërnikajt.
Sipas Stakës, Hodo ka pasur komunikime me Pjetërnikajn edhe pasi ky i fundit ishte larguar nga detyra e këshilltarit pranë KLP-së. Ai pretendoi se Pjetërnikaj i kishte dërguar Hodos në adresën e tij private të emailit një draft të një rregulloreje të Këshillit.
Nga ana tjetër, Hodo kërkoi kohë për t’u shprehur lidhur me kërkesën për përjashtimin e tij. Ai këmbënguli gjithashtu që kërkesa e Pjetërnikajt të lexohej e plotë gjatë mbledhjes dhe të bëhej publike.
Debati u përshkallëzua më tej pasi anëtari Sokol Stojani argumentoi se fillimisht duhej të shqyrtohej kërkesa e Stakës për përjashtimin e Hodos dhe më pas ajo e Pjetërnikajt.
Ky qëndrim solli një tjetër kërkesë për përjashtim. Hodo kërkoi që edhe Stojani të përjashtohej nga shqyrtimi, duke shprehur dyshime mbi objektivitetin e tij.
Në këtë mënyrë, procedura nisi me kërkesën e Pjetërnikajt për përjashtimin e Stakës dhe vijoi me kërkesat Staka-Hodo dhe Hodo-Stojani.
Përplasja mes Hodos dhe Stojanit kaloi edhe në replika personale, ku dy anëtarët shkëmbyen akuza lidhur me formimin dhe shkollimin e njëri-tjetrit.
Debati u tensionua edhe më tej kur Stojani paralajmëroi se mund të kërkonte përjashtimin e kryetares së KLP-së, Mirela Bogdani, pasi pretendoi se ajo kishte reaguar me të qeshur në mënyrë ironike gjatë diskutimit.
Situata solli reagimin e anëtares Ledina Riza, e cila kritikoi tonet e debatit.
“Më vjen zor që jam në këtë tavolinë… të arrijë niveli i diskutimeve në të tilla banalitete nuk i takon kësaj tavoline”, deklaroi Riza, duke kërkuar respekt ndaj kandidatëve dhe publikut.
Përplasjet zhvillohen në një moment kur KLP po përballet edhe me vonesa në procesin e zgjedhjes së Prokurorit të Përgjithshëm. Pesë kandidatët ende nuk janë dërguar në ILDKPKI për verifikimin e pasurisë, ndërsa procesi duhet të përfundojë brenda javës së parë të dhjetorit.
Në garë për drejtimin e Prokurorisë së Përgjithshme janë prokurori i SPAK, Adnan Xholi, ish-Prokurorja e Përgjithshme e Përkohshme, Arta Marku, prokurorja pranë Eurojust, Fatjona Memçaj, si dhe prokurorët e Tiranës Rovena Zoto dhe Ylli Pjetërnikaj.
Në përfundim të procesit, KLP duhet të rendisë tre kandidatët më të kualifikuar dhe t’ia përcjellë listën Kuvendit, i cili do të votojë për Prokurorin e ri të Përgjithshëm.