Ministri për Evropën dhe Punët e Jashtme, Ferit Hoxha, u takua me Nënsekretaren e Shtetit për Çështjet Politike, Allison Hooker, në kuadër të Forumit Strategjik të Bledit.
Përmes një postimi në platformën “X”, Hoxha bëri të ditur se gjatë takimit u riafirmua rëndësia e partneritetit strategjik mes Shqipërisë dhe Shteteve të Bashkuara, si dhe angazhimi i përbashkët për forcimin e bashkëpunimit dypalësh në fusha me interes të ndërsjellë.
Në fokus të diskutimeve, thotë kryediplomati shqiptar ishte bashkëpunimi në fushën e mbrojtjes dhe sigurisë, si dhe koordinimi brenda NATO-s, veçanërisht pas Samitit të Aleancës në Ankara dhe në prag të samitit të ardhshëm të NATO-sm që do të zhvillohet në Shqipëri.
Hoxha dhe Hooker diskutuan gjithashtu situatën e sigurisë dhe zhvillimet e fundit në Ballkanin Perëndimor.
Sipas ministrit, të dyja palët riafirmuan rëndësinë e angazhimit të vazhdueshëm për forcimin e stabilitetit dhe sigurisë në rajon.
Ministri Hoxha theksoi se marrëdhëniet Shqipëri-SHBA mbështeten në një partneritet të konsoliduar, vlera të përbashkëta demokratike dhe solidaritetin transatlantik.
“Ishte kënaqësi të takohesha me Nënsekretaren e Shtetit për Çështjet Politike, Allison Hooker, në margjinat e Forumit Strategjik të Bledit. Në vijim të diskutimeve tona në Uashington, korrikun e kaluar, riafirmuam rëndësinë e partneritetit strategjik Shqipëri-SHBA dhe angazhimin tonë të përbashkët për të thelluar më tej bashkëpunimin tonë dypalësh në fushat me interes të ndërsjellë.
Shkëmbyem mendime mbi bashkëpunimin në mbrojtje dhe siguri, si dhe mbi bashkëpunimin tonë brenda NATO-s, veçanërisht pas Samitit në Ankara dhe përpara Samitit të ardhshëm të Aleancës në Shqipëri. Diskutuam gjithashtu mjedisin e sigurisë dhe zhvillimet e fundit në Ballkanin Perëndimor, duke riafirmuar rëndësinë e angazhimit të vazhdueshëm në mbështetje të stabilitetit dhe sigurisë rajonale.
Shqipëria dhe Shtetet e Bashkuara janë të bashkuara nga një partneritet i gjatë i rrënjosur në vlerat e përbashkëta demokratike, solidaritetin transatlantik dhe një angazhim të përbashkët për sigurinë. Ne mezi presim të vazhdojmë dialogun dhe bashkëpunimin tonë të ngushtë, me fokus në arritjen e rezultateve të prekshme që avancojnë interesat tona të përbashkëta dhe u sjellin dobi të dy vendeve tona“, shkruan ministri i Jashtëm.