Pesë aparate celularë janë gjetur gjatë një kontrolli të zhvilluar në orët e para të mëngjesit në sektorin B të burgut të Durrësit, ku ndodhet i paraburgosur edhe kryetari i Bashkisë së Tiranës, Erion Veliaj, së bashku me ish-zyrtarë të tjerë.
Kontrolli është kryer nga strukturat e Drejtorisë së Përgjithshme të Burgjeve. Ende nuk është përcaktuar se kujt prej personave të këtij sektori u përkasin pajisjet e sekuestruara.
Celularët i janë përcjellë SPAK-ut përmes BKH-së, ku pritet t’i nënshtrohen ekspertizës në laboratorin e posaçëm. Ekspertiza do të synojë të identifikojë përdoruesit e pajisjeve dhe të përcaktojë mënyrën se si ato kanë përfunduar brenda ambienteve të burgut.
Gjithashtu, hetuesit pritet të verifikojnë nëse celularët janë përdorur dhe komunikimet që mund të jenë kryer përmes tyre.
Ky nuk është rasti i parë i sekuestrimit të pajisjeve të tilla në institucionet penitenciare. Më herët, autoritetet kanë sekuestruar dhe dërguar në SPAK edhe telefonin e Laert Haxhiut.
Ndërkohë, javën e kaluar një tjetër aparat celular u gjet në burgun e Peqinit dhe iu përcoll gjithashtu SPAK-ut për ekspertizë.