Kuvendi i Shqipërisë do të rikthehet në punimet parlamentare të martën, më 8 shtator, në orën 17:00, pas përfundimit të pushimeve të verës.
Seanca plenare do të shënojë nisjen zyrtare të Sesionit të III-të të Legjislaturës së XI-të.
Deputetët janë thirrur në seancën e parë plenare publike me urdhrin nr. 51, të datës 4 shtator 2026, të firmosur nga Kryetari i Kuvendit, Niko Peleshi.
Sipas dokumentit, seanca e 8 shtatorit do të ketë tri pika kryesore në rendin e punimeve.
Fillimisht do të bëhet çelja zyrtare e Sesionit të III-të të Legjislaturës së XI-të të Kuvendit të Shqipërisë, në përputhje me nenin 74, pika 1 të Kushtetutës dhe Rregulloren e Kuvendit.
Më pas, deputetët do të shqyrtojnë dhe miratojnë procesverbalet e seancës së fundit plenare, të zhvilluar më 27 korrik 2026.
Në fund të seancës do të paraqiten njoftimet zyrtare për projektligjet e depozituara dhe nismat e reja parlamentare.
Me këtë seancë nis zyrtarisht një sesion i ri i punimeve të Kuvendit, pas ndërprerjes së aktivitetit parlamentar gjatë muajve të verës.