Ka ngritur siparin edicioni i 21 i Festivalit Ndërkombëtar të Filmit për të drejtat e Njeriut në ambientet e Akademisë së Filmit Marubi.
Të pranishëm në natën e parë ishin personalitete të artit, kinematografisë, diplomacisë por dhe fushave të tjera.
Vetë drejtori ekzekutiv i këtij festivali Kujtim Çashku dha detaje për pjesëmarrjen nga vende të ndryshme ku në fokus janë konfliktet globale dhe shteti i së drejtës.
Festivalet e filmit që në fokus kanë të drejtat e njeriut për shkak të tematikës që trajtojnë janë të paktë në numër nëpër botë.
Vlerësime për këtë festival të rëndësishëm të kinematografisë në vendin tonë pati edhe nga ambasadori i Spanjës në Shqipëri.
“Është një privilegj për ambasadën e Spanjës dhe për mua të jem partneri kryesor institucional i edicionit të 21-të të festivalit ndërkombëtar të filmit për të drejtat e njeriut në Shqipëri. Ky festival shërben si një gur themeli i jetës kulturore dhe qytetare në Shqipëri, ofron një platformë unike për artin për të sjellë, dëshmuar, edukuar dhe frymëzuar ndryshimin në sferën e dinjitetit njerëzor dhe lirive themelore”, tha Ambasadori i Spanjës në Shqipëri, Gabriel Cremades.
Edicioni i 21 i Festivalit Ndërkombëtar të Filmit për të drejtat e Njeriut do të shfaqë filma të ndryshëm deri më 19 shtator në ambientet e Akademisë së Filmit Marubi në Tiranë.