Shtetet e Bashkuara thonë se respektojnë vendimin e Gjykatës Speciale në Hagë për dënimin e katër ish-krerëve të UÇK-së. Në një reagim Departamenti Amerikan i Shtetit shpreh mbështetjen për drejtësinë për të gjitha viktimat e luftës dhe familjet e tyre, ndërsa u bën thirrje palëve të shmangin retorikën nxitëse.
“Shtetet e Bashkuara respektojnë vendimin e Dhomave të Specializuara të Kosovës të marrë sot. Ne mbështesim drejtësinë për të gjitha viktimat dhe familjet e tyre dhe rikonfirmojmë mbështetjen tonë për llogaridhënien, procesin e rregullt ligjor dhe sundimin e ligjit. U bëjmë thirrje të gjitha palëve të respektojnë vendimin e gjykatës, të shmangin retorikën nxitëse dhe të vazhdojnë të punojnë drejt një të ardhmeje paqësore dhe demokratike”, thuhet në reagimin e DASH.
Në të njëjtën linjë ishte edhe Bashkimi Europian, i cili bëri thirrje që drejtësia të ndjekë rrjedhën e saj pa ndërhyrje dhe që palët në Kosovë e në rajon të tregojnë përmbajtje. Komisionerja për Zgjerimin, Marta Kos, theksoi se Dhomat e Specializuara janë një institucion i pavarur dhe se të dënuarit kanë të drejtë ta apelojnë vendimin.
“Dhomat e Specializuara të Kosovës janë një organ gjyqësor i paanshëm dhe i pavarur. Vendimet e saj duhet të respektohen dhe të dënuarit kanë të drejtë të apelojnë. Kjo ka të bëjë me llogaridhënien individuale dhe drejtësinë për viktimat dhe familjet e tyre nga të gjitha komunitetet në Kosovë. U bëj thirrje aktorëve në rajon që të ndihmojnë në shërimin e plagëve të së kaluarës. Vetëm nëpërmjet pajtimit vendet e rajonit mund të kapërcejnë përçarjet dhe të përparojnë drejt një të ardhmeje të përbashkët në BE”, tha Kos.
Por një qëndrim krejt tjetër ka mbajtur Richard Grenell, ish i dërguari i presidentit Donald Trump për misione të posaçme. Ai e cilësoi dënimin e Hashim Thaçit “skandaloz” dhe i bëri thirrje edhe kryeministrit të Kosovës, Albin Kurti të veprojë për shpërbërjen e Gjykatës Speciale.
Grenell iu përgjigj më pas drejtpërdrejt Marta Kos-it, duke kërkuar ndërprerjen e financimit të Gjykatës Speciale, duke e quajtur një gjykatë radikale.
“Jo. Të mbash dikë në burg për gjashtë vjet për diçka që pretendohet se ka ndodhur 25 vjet më parë është e turpshme. Evropa duhet t’i reformojë institucionet e saj. Kjo nuk është drejtësi; është aktivizëm i elitave. Financimi për këto gjykata radikale duhet të ndërpritet menjëherë”, shkroi Grenell.
Hashim Thaçi dhe Jakup Krasniqi u dënuan me nga 25 vite burg, Kadri Veseli me 18 vite dhe Rexhep Selimi me 13 vite burgim, pasi u shpallën fajtorë për krime lufte.