“Ku ishte Bashkimi Europian kur serbët keqtrajtonin shqiptarët e Kosovës?” Kjo është pyetja që diplomati amerikan William Walker i drejton BE-së pas dënimit me 81 vite burgim të katër ish-krerëve të UÇK-së nga Gjykata Speciale në Hagë.
Në një prononcim për Klan Kosovën, Walker e ka cilësuar vendimin si një ditë të kobshme për Kosovën dhe ka kritikuar ashpër procesin gjyqësor ndaj ish-drejtuesve të UÇK-së.
Ai ka pyetur Bashkimin Europian se ku ishte përpara nisjes së luftës, kur, sipas tij, serbët i keqtrajtonin në mënyrën më mizore kosovarët.
Diplomati amerikan ka kujtuar se gjatë luftës kishte pasur dhunime dhe trajtime mizore, ndërsa ka kritikuar faktin që liderët kosovarë të UÇK-së po gjykohen, sipas tij, nga gjyqtarë dhe avokatë që nuk kanë njohuri të mjaftueshme për Kosovën. Walker e ka cilësuar vendimin si një ditë të kobshme dhe shumë të rëndë, duke thënë se ishte trishtuar shumë nga ai.
Walker ka kritikuar gjithashtu procesin gjyqësor ndaj ish-drejtuesve të UÇK-së dhe ka shprehur shqetësimin se vendimi mund të ndikojë në mënyrën se si Kosova do të shihet nga ndërkombëtarët.
Gjykata e Hagës dënoi Hashim Thaçin dhe Jakup Krasniqin me nga 25 vite burg, Kadri Veselin me 18 vite dhe Rexhep Selimin me 13 vite, për një total prej 81 vitesh. Katër ish-krerët e UÇK-së u shpallën fajtorë për krime lufte, ndërsa u rrëzuan akuzat për krime kundër njerëzimit. Mbrojtësit ligjorë dhe familjarët e tyre kanë njoftuar se do ta apelojnë vendimin.