Shqipëria ndjek një qasje të ndryshme nga Bashkimi Europian për mishin që importohet nga Brazili.
Ky vendim i Ministrisë së Bujqësisë për të lejuar industrinë e përpunimit të mishit të ushqejë shqiptarët me mish derri nga Brazili, sipas ekspertëve të sigurisë ushqimore, ngre dyshime të mëdha mbi cilësinë e mishit.
Më 3 shtator, Europa i ngriti traun mishit nga Brazili. Shqipëria ndoqi të njëjtën rrugë për mishin e shpendëve dhe të gjedhit, por jo për mishin e derrit.
Ndryshe nga Europa, e cila nuk e ka pranuar mishin e derrit nga Brazili, pasi e konsideron të pasigurt, për Shqipërinë derri nuk përbën problem. Kështu, ne do të vazhdojmë të presim kontejnerë me mish derri, i cili do të përdoret në restorante, fast-food-e dhe në industrinë e sallamit.
“Kjo masë gjysmake nuk ka asnjë lloj kuptimi nga pikëpamja shkencore apo e vlerësimit të riskut. Qoftë mishi i pulës, i viçit apo i derrit, të gjitha vijnë nga i njëjti vend, që është Brazili, i cili përdor një regjim krejtësisht të ndryshëm nga ai i BE-së sa i përket përdorimit të antibiotikëve”, shprehet eksperti i sigurisë ushqimore, Edmond Panariti.
Kufizimi i importit të pulës dhe viçit mund të shkaktojë presion mbi çmimin e këtyre produkteve, ndërsa mishi i derrit do të vazhdojë të ketë të njëjtin çmim. Por pyetja është: sa i sigurt është mishi që refuzohet nga BE-ja dhe pranohet nga Shqipëria?
“Çfarë mund të bëjë Shqipëria për të ruajtur industrinë e përpunimit të mishit? Vetë ministri duhet të ulet me këta prodhues dhe t’i inkurajojë që të ndryshojnë kahun e importit. Kjo mund të bëhet duke krijuar edhe lehtësi fiskale”, shton Panariti.
Bujqësia dhe siguria ushqimore janë çështje që na prekin të gjithëve. Prandaj, para se ministria të vendosë se çfarë do të hamë, duhet të sigurohet për cilësinë e produktit. Kjo bëhet duke shtuar numrin e analizave laboratorike në PIK, me një qëllim të vetëm: të parandalohet hyrja e ushqimeve të pasigurta dhe të pashëndetshme në pjatat tona.