Policia e Kosovës ka ndërhyrë për të larguar protestuesit nga zona pranë Kuvendit. Efektivët kanë shtyrë turmën nga sheshi “Skënderbeu” në drejtim të sheshit “Zahir Pajaziti”, duke krijuar një perimetër më të gjerë sigurie rreth institucioneve.
Gjatë ndërhyrjes janë përdorur gaz lotsjellës dhe sprej, ndërsa policia ka vendosur kordonin e njësive për kontrollin e turmave dhe ka vijuar shtyrjen e protestuesve larg Kuvendit dhe ndërtesës së Qeverisë.
Protestuesit kanë kundërshtuar ndërhyrjen e policisë. Gjatë përpjekjeve për t’i larguar nga qendra, disa prej tyre kanë hedhur shishe qelqi dhe mjete piroteknike në drejtim të efektivëve.
Sipas raportimeve nga terreni, sheshet “Skënderbeu” dhe “Nënë Tereza” janë zbrazur, ndërsa policia po pengon rikthimin e protestuesve përmes rrugëve anësore. Përplasjet kanë shkaktuar edhe raportime për persona të lënduar, por informacioni për numrin dhe gjendjen e tyre ende nuk është konfirmuar.
Ngjarjet vijnë pas tensioneve të krijuara rreth Kuvendit të Kosovës, ku protestuesit kishin kërkuar miratimin e ndryshimeve në Ligjin për Dhomat e Specializuara. Policia kishte përdorur më herët gaz lotsjellës për të liruar daljet e Kuvendit dhe për t’u mundësuar deputetëve largimin nga objekti.
Situata politike mbetet e lidhur edhe me zgjedhjen e presidentit të Kosovës, për të cilën afati i fundit është 6 tetori. Deri tani, negociatat mes forcave politike nuk kanë prodhuar një marrëveshje përfundimtare.