Presidentja e Komisionit Evropian, Ursula von der Leyen, ka shprehur mbështetjen për thirrjen e presidentit ukrainas, Volodymyr Zelensky, për armëpushim me Rusinë.
Në reagimin e saj të dielën, von der Leyen njoftoi se nevojat financiare të Ukrainës do të diskutohen në mbledhjen e ardhshme të Këshillit Evropian. Diskutimet pritet të përfshijnë edhe mbështetjen për dronë dhe raketa, me synim forcimin e kapaciteteve mbrojtëse të vendit.
Mbështetje për ndërprerjen e sulmeve ndaj infrastrukturës energjetike shprehu edhe presidenti francez, Emmanuel Macron. Ai deklaroi se Franca mbështet pa rezerva një armëpushim të mirëfilltë në sektorin energjetik.
Reagimet erdhën pasi presidenti amerikan, Donald Trump, njoftoi se Rusia dhe Ukraina kishin arritur një armëpushim për ndalimin e sulmeve ndaj objekteve energjetike, pa dhënë hollësi për kushtet e tij.
Zelensky, ndërkaq, deklaroi se ishte ende në pritje të detajeve të marrëveshjes së njoftuar nga presidenti amerikan.