Sulmet e protestuesve në kryeqytet kanë dhënë efektet e para për qytetarët. Shërbimi i transportit publik në Tiranë e Kamëz është pezulluar deri në një moment të dytë që do të sjellë normalizimin e situatës. Protestuesit nuk kanë kursyer aktet vandale, duke thyer xhamat e disa prej urbanëve të kryeqytetit dhe Kamzës, të cilët janë detyruar të pezullojnë aktivitetin.
Ndërkohë bankat, të cilat kanë qenë objekt dhune nga persona të maskuar, kanë njoftuar se degët që operojnë rreth qendrës së kryeqytetit, por edhe në zona të tjera, janë mbyllur. Klientët janë njoftuar për mbylljen përmes rrjeteve sociale.
Shoqata Shqiptare e Bankave (AAB) ka dënuar sulmet ndaj institucioneve financiare, duke kërkuar nga autoritetet marrjen e masave për garantimin e sigurisë së punonjësve dhe klientëve, si dhe vijimësinë normale të shërbimeve bankare.
Shoqata Shqiptare e Bankave dënon sulmet ndaj institucioneve financiare gjatë protestës së 14 tetorit në Tiranë dhe u bën thirrje autoriteteve të marrin masa për të garantuar sigurinë dhe vijimësinë e shërbimeve bankare.
Shoqata u bën thirrje protestuesve të shmangin veprimet e dhunshme, ndërsa kërkon nga institucionet përgjegjëse të marrin masat e nevojshme për parandalimin e incidenteve të tilla.
“AAB u bën thirrje pjesëmarrësve në protesta të shmangin çdo veprim të dhunshëm. Institucionet përgjegjëse të marrin masat e nevojshme për parandalimin e incidenteve të tilla dhe garantimin e sigurisë publike. Mbrojtja e punonjësve dhe klientëve, respektimi i pronës private dhe garantimi i vijimësisë së shërbimeve bankare janë thelbësore në çdo rrethanë”, thuhet në deklaratë.
AAB i siguron qytetarët marrëdhënia e tyre me bankat mbetet e pacenuar dhe e sigurt, pavarësisht ngjarjeve të ndodhura. Në deklaratë theksohet gjithashtu se mbrojtja e punonjësve dhe klientëve, respektimi i pronës private dhe garantimi i shërbimeve bankare janë thelbësore në çdo rrethanë, thuhet në deklaratën për shtyp.
Edhe bizneset janë dëmtuar rëndë gjatë këtyre tri ditëve pasi protestuesit i kanë shënjestruar vazhdimisht duke i shkatërruar, djegur dhe vjedhur. Qendra të mëdha tregtare me qindra biznese brenda kanë mbyllur dyert. Një destinacion i rëndësishëm turistik si Kalaja e Tiranës ishte gjithashtu e kyçur këtë të enjte.
Ndërkohë, Dhoma e Tregtisë bëri thirrje për distancim të qartë nga dhuna dhe masa të qarta nga policia.
“Kërkojmë masa konkrete parandaluese, prani të përshtatshme në zonat e rrezikuara dhe ndërhyrje në kohë ndaj çdo akti dhune apo shkatërrimi. Autorët e dhunës duhet të identifikohen dhe të mbajnë përgjegjësi individuale sipas ligjit, pa ia ngarkuar fajin kolektivisht çdo qytetari që ushtron paqësisht të drejtën e protestës. Kërkojmë gjithashtu dokumentimin e plotë të dëmeve dhe komunikim të drejtpërdrejtë ndërmjet autoriteteve dhe sipërmarrjeve të prekura, për të mundësuar denoncimin, hetimin dhe ndjekjen e procedurave përkatëse”, thuhet në deklaratë.
Situata ka detyruar Dhomën e Tregtisë dhe Industrisë që së bashku me shoqatat kryesore të bizneseve të thërrasin një konferencë për mediat. Dëmi ekonomik sipas tyre është shumë i madh, dhe se shkatërrimi i pronës private nga protestuesit është një akt i paprecedent. Ata i bëjnë thirrje institucioneve përgjegjëse që të marrin masa urgjente, që të mos detyrohen të shkojnë në kushtet e vetëmbrojtjes.
“Protesta është ndoshta i vetmi zë qytetar, por a është ky mjeti për ta arritur këtë qëllim, kjo mbetet për t’u parë. Shkatërrimi i pronave private, precedent penal”, u shpreh Nikolin Jaka.
Shoqatat e bizneseve e cilësojnë një akt të paprecedentë dhunën ndaj pronës private, ndërsa kërkojnë dokumentin e plotë të dëmeve si dhe hetimin e vënien para përgjegjësisë të autorëve.