Projekti për ndërtimin e terminalit të autobusëve në qytetin e Burrelit po shkon drejt përfundimit. Punimet kanë avancuar ndjeshëm, duke i dhënë formën përfundimtare këtij investimi, i cili synon përmirësimin e shërbimit të transportit publik në Bashkinë Mat.
Punimet janë ndjekur nga afër nga kryetari i Bashkisë Mat, Altin Bojni, i cili u shpreh se, nëse vijojnë me këtë ritëm, ato pritet të përfundojnë shumë shpejt.
Sipas Bojnit, ky investim do të mundësojë sistemimin e automjeteve të transportit publik, si të linjave brenda territorit të Bashkisë Mat, ashtu edhe të atyre ndërqytetase. Terminali pritet të krijojë kushte më të mira për organizimin e transportit dhe ofrimin e një shërbimi më cilësor për qytetarët.
Ndërtimi i këtij objekti vjen si përgjigje ndaj një kërkese të vazhdueshme të operatorëve të transportit, por edhe të qytetarëve, të cilët kanë kërkuar prej kohësh një terminal të dedikuar, ku autobusët të kenë një vend të përshtatshëm për qëndrimin dhe nisjen e udhëtimeve.
Pas përfundimit të projektit, automjetet që kryejnë shërbimin e transportit publik drejt fshatrave të Bashkisë Mat, si dhe autobusët e linjave ndërqytetase, do të sistemohen në këtë terminal, duke synuar një organizim më të mirë të lëvizjes dhe lehtësimin e shërbimit për udhëtarët.