Policia ndaloi protestat në disa pjesë të Parisit të enjten, ndërsa Franca përgatitet për demonstrata të reja, vetëm pak ditë pasi tubimet e studentëve dhe grupeve të tjera u shndërruan në disa nga trazirat më të rënda rrugore të viteve të fundit.
Ndalimi në Paris do të jetë në fuqi nga ora 08:00 deri në orën 20:00 dhe nga ora 06:00 deri në 18:00 dhe do të përfshijë pika kyçe në kryeqytetin francez, si Pallati presidencial i Elizesë, të dy dhomat e parlamentit, si dhe zona të frekuentuara nga turistët, si Muzeu i Luvrit dhe Champs-Élysées.
Ndërkohë, autoritetet kanë ndaluar “të gjitha demonstratat” në Lion, qytetin e tretë më të madh të Francës, për ditën e shtunë.
Prefektura e rajonit të Rhone-it njoftoi të enjten përmes një deklarate për mediat se, “duke marrë parasysh ngjarjet e 17 tetorit, prefekti ka vendosur të ndalojë me dekret të gjitha demonstratat në qytetin e Lionit këtë të shtunë, më 24 tetor”.
Ndërkohë, numri i forcave të rendit që do të angazhohen gjatë demonstratave mbarëkombëtare të planifikuara për të shtunën e ardhshme do të jetë 20 për qind më i lartë se më 17 tetor, deklaroi një zyrtar i Ministrisë së Brendshme të Francës.
“Jemi në një nivel angazhimi që është 20 për qind më i lartë se ai i javës së kaluar,” tha Jean-Didier Berger për rrjetin televiziv BFMTV.
Ai shtoi se masat e planifikuara të sigurisë do të përforcohen nga ushtarë të forcës antiterroriste “Sentinelle”, njësi elitare të policisë dhe xhandarmërisë – siç janë RAID, GIGN dhe BRI – si dhe nga helikopterë e automjete të blinduara.
Më 17 tetor, rreth 60,000 policë dhe xhandarë u mobilizuan në të gjithë vendin.