Aeroporti Ndërkombëtar i Tiranës do të realizojë gjatë muajit nëntor një fazë të rëndësishme punimesh në pistë dhe në infrastrukturën mbështetëse, në kuadër të programit të vazhdueshëm të investimeve të Kastrati Group, me fokus në rritjen e sigurisë, eficiencës operacionale dhe standardeve të infrastrukturës aeroportuale.
Punimet do të zhvillohen nga data 9 deri më 26 nëntor, me mbyllje të planifikuara të aeroportit gjatë orëve të natës në data të caktuara brenda kësaj periudhe. Orari është përcaktuar me qëllim minimizimin e ndikimit në operacione, duke siguruar njëkohësisht kohën e nevojshme për realizimin e ndërhyrjeve teknike në mënyrë të sigurt dhe në përputhje me standardet përkatëse.
Këto ndërhyrje janë pjesë e përgatitjeve për sezonin 2027 dhe synojnë t’i përgjigjen rritjes së vazhdueshme të trafikut ajror, volumit të pasagjerëve dhe kërkesave në rritje të tregut. Investimet synojnë të forcojnë kapacitetet e Aeroportit Ndërkombëtar të Tiranës dhe të sigurojnë një infrastrukturë më moderne, më të qëndrueshme dhe të përgatitur për nevojat e ardhshme operacionale. Investimet mbështesin gjithashtu përgatitjen e infrastrukturës aeroportuale për evente të rëndësishme ndërkombëtare që Shqipëria pritet të mirëpresë, përfshirë edhe Samitin e NATO-s.
Projekti do të përfshijë rehabilitimin e plotë të një pjese të konsiderueshme të shtresës së pistës, instalimin e një sistemi të ri ndriçimi aeroportual me teknologji LED, përmirësimin e rrugëve lidhëse (taxiways), si dhe ndërhyrje të tjera në terminal.
Për shkak të mbylljeve të planifikuara gjatë periudhës 9–26 nëntor, disa fluturime mund të pësojnë ndryshime në oraret e nisjes ose mbërritjes. Pasagjerët që kanë rezervime gjatë kësaj periudhe këshillohen të jenë veçanërisht të vëmendshëm ndaj çdo njoftimi të kompanisë së tyre ajrore dhe të kontrollojnë rregullisht mesazhet dhe email-et e përdorura gjatë rezervimit.
Në rast të ndryshimit të orarit të një fluturimi, kompania ajrore përkatëse do të informojë pasagjerët përmes të dhënave të kontaktit të deklaruara në rezervim. Për këtë arsye, pasagjerët këshillohen të verifikojnë informacionin më të fundit mbi fluturimin e tyre përpara nisjes drejt aeroportit.
Aeroporti Ndërkombëtar i Tiranës vijon koordinimin e ngushtë me kompanitë ajrore dhe partnerët operacionalë për të minimizuar ndikimin e punimeve dhe për të garantuar një proces të sigurt, të koordinuar dhe efikas gjatë gjithë periudhës së ndërhyrjeve.