Bashkia e Matit ka nisur dëgjesat publike në tetë njësitë administrative për diskutimin e buxhetit të vitit 2027 dhe tarifave vendore që do të aplikohen. Në takimet me banorët, kryetari i bashkisë, Altin Bojni, së bashku me stafin e tij, ka prezantuar investimet e realizuara, të ardhurat e siguruara dhe projektet që parashikohen të zbatohen në vijim.
Gjatë këtyre takimeve është vënë theksi te investimet e kryera ndër vite në territorin e Matit, ku përfshihen asfaltimi i rrugëve, përmirësimi i furnizimit me ujë të pijshëm, rikonstruksioni i shkollave dhe ndërhyrjet në kanalet ujitëse. Sipas kryebashkiakut Bojni, një pjesë e rëndësishme e këtyre investimeve është realizuar gjatë drejtimit të bashkisë nga ish-kryetari, Agron Malaj.
“Investime të mëdha janë kryer vitet e fundit nën kujdesin e ish-kryetarit të bashkisë, Agron Malaj. Rrugë të asfaltuara, ujë i pijshëm 24 orë në Burrel dhe në shumë fshatra, shkolla bashkëkohore dhe kanale ujitëse në shumë zona të Matit. Në qytetin e Burrelit ndryshimet janë të mëdha”, u shpreh Bojni.
Sa i përket projekteve të ardhshme, kryetari i bashkisë bëri të ditur se vëmendje do t’i kushtohet përmirësimit të infrastrukturës, shtimit të hapësirave të gjelbra dhe mirëmbajtjes së mjedisit. Ndërhyrje parashikohen edhe në veshjen e pallateve, si dhe në institucionet arsimore, përfshirë shkollat “Ilia Qiqi”, Zenisht, Baz dhe Bruç.
Një tjetër projekt i rëndësishëm është asfaltimi i 20 kilometrave të tjerë rrugë në zonat rurale, krahas nisjes së punimeve për rrugën Skuraj–Burrel. Në planet e bashkisë përfshihen gjithashtu investime në disa kanale ujitëse, me synimin për të përmirësuar infrastrukturën bujqësore dhe kushtet për banorët e zonave rurale.
Ndërkohë, në qytetin e Burrelit, sipas Bojnit, do të vijojnë ndërhyrjet për përmirësimin e rrugëve, parqeve, trotuareve dhe ndriçimit publik.
Dëgjesat publike synojnë të informojnë qytetarët mbi prioritetet e bashkisë për vitin e ardhshëm, si dhe të krijojnë mundësinë që banorët të shprehin mendimet dhe kërkesat e tyre lidhur me investimet dhe tarifat vendore që do të përcaktohen në kuadër të buxhetit të vitit 2027.