Në përgjigjen e dërguar drejtuesve të dy komisioneve parlamentare, Bledi Çuçit, kryetar i Komisionit të Sigurisë, dhe Fatmir Xhafës, kryetar i Komisionit për Mbikëqyrjen Institucionale, ministri i Drejtësisë, Toni Gogu, ka bërë të ditur se ka urdhëruar një inspektim lidhur me transferimin e papritur të Erion Veliajt nga burgu i Durrësit në atë të Fierit, dy ditë më parë.
Burimet bëjnë me dije se ministri ka theksuar se, sipas ligjit, Drejtoria e Përgjithshme e Burgjeve është institucioni drejtpërdrejt përgjegjës për transferimin e personave të paraburgosur dhe të dënuar.
Në deklaratën e një dite më parë, Drejtoria e Përgjithshme e Burgjeve njoftoi se gjatë 12 ditëve të fundit ishin urdhëruar 24 transferime.
Ndërkohë, mësohet se ministri Gogu nuk e ka kufizuar inspektimin vetëm te rasti i kryebashkiakut të Tiranës, Erion Veliaj, por e ka shtrirë atë edhe mbi të gjitha lëvizjet e urdhëruara nga Drejtoria e Përgjithshme e Burgjeve.