Këngëtarja shqiptare me famë ndërkombëtare, Bebe Rexha, ka shënuar një tjetër sukses në muzikë.
Kënga e saj “New Religion” është renditur në vendin e 35-të në listën e 50 këngëve më të dëgjuara nga artistet femra në Spotify, një rezultat që këngëtarja e ka ndarë me krenari me ndjekësit e saj.
Ka qenë vetë artistja ajo që ka bërë të ditur lajmin përmes një postimi në platformën X, ku ka publikuar edhe renditjen përkatëse. Rexha është shprehur e emocionuar për këtë sukses, duke e cilësuar atë si një arritje të veçantë, sidomos në këtë periudhë të re të karrierës së saj.
“Fakti që ‘New Religion’ renditet në vendin e 35-të në listën Top 50 të Spotify-t është vërtet i jashtëzakonshëm”, ka shkruar këngëtarja.
Ky rezultat merr një rëndësi edhe më të madhe duke pasur parasysh rrugëtimin e fundit profesional të Bebe Rexhës. Këngëtarja vendosi të shkëputej nga kompania diskografike Warner Records, për të vazhduar karrierën si artiste e pavarur, një hap që e ka vendosur përballë sfidave të reja në industrinë muzikore.
Siç ka theksuar edhe vetë ajo, artistët e pavarur përballen me vështirësi më të mëdha, veçanërisht për sa i përket financimit dhe promovimit, krahasuar me ata që mbështeten nga kompanitë e mëdha diskografike.
Një tjetër detaj që e bën këtë sukses edhe më domethënës është fakti se “New Religion” është i vetmi projekt në listë që i përket një artisteje të pavarur.
“Jam krenare që vendosa t’i besoja vetes dhe akoma më krenare për atë që po ndërtojmë. Faleminderit që jeni pjesë e këtij rrugëtimi. Nuk ka qenë një rrugë e lehtë, por ka qenë një rrugëtim i bukur”, është shprehur Rexha.
Për këngëtaren shqiptare, kjo renditje përfaqëson më shumë sesa një sukses në platformat muzikore. Ajo shihet si një konfirmim se vendimi për të marrë në dorë vetë drejtimin e karrierës po jep rezultatet e para, ndërsa i jep motivim për të vijuar me projekte të reja.
Në fund, Bebe Rexha ka shprehur mirënjohjen për fansat që e kanë mbështetur gjatë këtij rrugëtimi, duke e cilësuar këtë arritje si një moment të rëndësishëm në kapitullin e ri të karrierës së saj artistike.