Një koleksion i jashtëzakonshëm me më shumë se 800 veshje, aksesorë dhe sende personale të Princeshës Diana po tërheq vëmendjen e publikut. Pas këtij koleksioni qëndron amerikania Renae Plant, e cila prej 12 vitesh i është përkushtuar mbledhjes dhe ruajtjes së objekteve që i përkisnin princeshës së ndjerë. Gjithçka nisi në vitin 2014, kur një mik i sugjeroi të vizitonte një ankand të organizuar nga shtëpia e ankandeve Julien’s, ku ishin nxjerrë në shitje gjashtë fustane të Dianës. Në atë kohë, Plant dhe bashkëshorti i saj, Livinio Stuyck, po mendonin të investonin në një restorant picerie në Los Angeles. Por një vizitë në ankand ndryshoi planet e tyre dhe shënoi fillimin e një pasioni që do të zgjaste më shumë se një dekadë, raporton CNN.
Sot, Plant beson se zotëron një nga koleksionet private më të mëdha në botë të sendeve personale të Princeshës Diana.
Lidhja e saj me Dianën kishte nisur shumë më herët. Në vitin 1983, kur ishte vetëm 12 vjeçe, Plant pati mundësinë të takonte princeshën gjatë një vizite të saj në një fabrikë xhenxhefili në Australi.
Gjatë takimit, Diana humbi një objekt të vogël prej balte, të cilin Plant arriti ta gjente pasi u largua nga shokët e klasës dhe kaloi përtej një barrikade.
Ky episod mbeti një kujtim i veçantë për të dhe, sipas saj, shënoi fillimin e një lidhjeje emocionale me figurën e princeshës.
Në vitin 2018, ajo krijoi Fondacionin “The Princess & The Platypus”, një organizatë jofitimprurëse që mbështet bamirësi në përputhje me kauzat humanitare që Diana promovoi gjatë jetës së saj.
Për të ndërtuar koleksionin, Renae Plant dhe bashkëshorti i saj kanë bërë sakrifica të konsiderueshme financiare. Çifti ka përdorur edhe rifinancimin e hipotekës së banesës për të siguruar fondet e nevojshme për blerjet në ankande.
Në vitin 2015, Plant bleu për 200 mijë dollarë një fustan të krijuar nga Atelier Versace, të cilin Diana e kishte veshur gjatë jetës së saj.
Një nga blerjet më të rëndësishme ishte fustani me lule i stilistit Belville Sassoon, i njohur si “Fustani i Kujdesit”, të cilin princesha e vishte gjatë vizitave në spitalet e fëmijëve. Plant e bleu atë për 520 mijë dollarë.
Në të njëjtin ankand, ajo siguroi edhe 34 objekte të tjera, përfshirë një kapele me pupla struci, të cilën Diana e kishte mbajtur gjatë muajit të mjaltit. Vetëm për këtë blerje, Plant pagoi 26 mijë dollarë.
Në total, çifti shpenzoi rreth 1.9 milionë dollarë gjatë asaj dite ankandi.
Megjithatë, jo çdo blerje ka përfunduar me sukses. Plant tregon se humbi në ankand pulovrën e famshme të zezë me motive delesh, të cilën Diana e kishte veshur në vitin 1981.
Ajo u shit për një shifër rekord prej 1.14 milionë dollarësh. Më vonë, Plant arriti të blinte pulovrën e dytë identike, pasi Diana kishte pasur dy të tilla.
Një pjesë e madhe e koleksionit do të prezantohet në ekspozitën “Princesha Diana: Dashuri, Jetë dhe Trashëgimi–Një Jetë Dhurimi”, në Bibliotekën dhe Muzeun Presidencial Ronald Reagan në Kaliforni.
Ekspozita synon të rrëfejë jetën e Dianës, nga fëmijëria deri në vdekjen e saj tragjike në vitin 1997.
Vizitorët do të kenë mundësi të shohin fustanin e saj të nusërisë, veshje të ndryshme mbrëmjeje, letra personale, veshje nga fëmijëria, magnetofonët ku regjistronte kujtimet e saj zanore dhe objekte të tjera personale.
Mes tyre do të jetë edhe fustani i famshëm prej kadifeje që Diana veshi në vitin 1985, kur kërceu me aktorin John Travolta gjatë një darke në Shtëpinë e Bardhë, në kohën e presidentit Ronald Reagan. Ky fustan është marrë hua për ekspozitën.
Një tjetër objekt me rëndësi të veçantë është një fustan i zi i stilistit Jacques Azagury, të cilin Diana nuk arriti ta vishte kurrë. Princesha kishte kërkuar disa ndryshime në dizajnin e tij, por vdekja e saj në gusht të vitit 1997 e la veshjen të papërfunduar.
Pasioni i Plant për koleksionimin vazhdon, megjithëse ajo pranon se jo çdo objekt mund ta përballojë financiarisht.
Më 5 dhjetor, në Sotheby’s në Nju Jork, pritet të dalë në ankand fustani i famshëm i hakmarrjes, i krijuar nga stilistja Christina Stambolian, të cilin Diana e veshi në vitin 1994, pas deklaratave publike të Princit Charles për tradhtinë martesore.
Fustani vlerësohet të ketë një çmim fillestar prej rreth 300 mijë dollarësh.
Plant ka pranuar se dëshiron ta sigurojë edhe këtë veshje, por për momentin nuk ka mundësi financiare për ta blerë.
Për të, ky koleksion nuk është thjesht një investim financiar, por një mision personal për të ruajtur dhe bashkuar sa më shumë objekte që lidhen me jetën dhe trashëgiminë e Princeshës Diana.