Policia e Elbasanit një ditë pasi shoqëroi ish deputetin e PD-së, Aurel Bylykbashi për deklaratat e tij se do të ketë vëllavrasje më 30 qershor, policia jep dhe njoftimin zyrtar për të.
Sipas uniformave blu Bylykbashi do të hetohet në gjendje të lirë për veprat penale “Thirrje publike për veprime të dhunshme”, “Pengimi me dhunë i veprimtarisë së partive politike” dhe “Pengimi i subjekteve zgjedhore”.
Një ditë më parë, gjatë një takimi të Aleancës Qytetare për Mbrojtjen e Demokracisë në Elbasan, Bylykbashi tha se nëse do të ketë përplasje më 30 qershor, le të ketë.
“Situata konfliktuale politike po çon vendin drejt një konflikti total, qoftë nga ana institucionale qoftë ligjore që paralajmërojnë fatkeqësisht 1997-ën. Aleanca u bëri thirrje të gjithë qytetarëve elbasanas të mos bëhen bashkëpunëtorë të procesit të 30 qershorit, që synon eliminimin e pluralizmit politik dhe kthimin e vendit ne monizëm”, ka thënë Bylykbashi.
NJOFTIMI I POLICISE
Specialistët për Hetimin e Krimit Kundër Personit, në DVP Elbasan proceduan penalisht në gjendje të lirë për veprat penale “Thirrje publike për veprime të dhunshme”, “Pengimi me dhunë i veprimtarisë së partive politike” dhe “Pengimi i subjekteve zgjedhore”, shtetasin A.B., 53 vjeç, banues në Elbasan.
Në media dhe rrjete sociale ai ka bërë thirrje për veprime të dhunshme dhe pengim të procesit të votimit më datë 30 qershor 2019.
Materialet hetimore i kaluan Prokurorisë pranë Gjykatës së Shkallës Parë Elbasan, për veprimet e mëtejshme.