Analisti Enton Abilekaj i ftuar në “Arena” nga Dritan Hila në Ora News, tha se opozita po gabon kur u thotë qytetarëve se do të rrëzohet qeveria në protestën e së shtunës, ndërsa gazetari Mentor Kikia tha se qeveria rrëzohet brenda ditës vetëm me grusht shteti.
Abilekaj: “Unë mendoj që ka një gabim taktik tek opozita. Janë duke i thirrur njerëzit më 16 shkurt me idenë se është duke u rrëzuar qeveria. Kjo ngjan me 21 janarin. 21 janari ishte me të njëjtat parulla siç thotë tani Edi Rama. Nuk do ketë fjalime. Pra është një situatë e ngjashme dhe është momenti që qeveria të rrëzohet. Për mua ky është një gabim i madh taktik. Është 100% e sigurt që më 16 shkurt nuk bie qeveria. Kjo mund të jetë bumerang dhe të dielën njerëzit mund të shohen që qeveria nuk është rrëzuar dhe kjo tregon një gënjeshtër tjetër. Nëse ju kujtohet vjet do të niste stina e madhe e protestave të opozitës. Më 27 janar u zhvillua një protestë që nuk ishte as e madhe dhe pas asaj nuk u zhvillua asnjë protestë tjetër. Opozita sot po mundohet të mbledhë të gjithë faktorët socialë të pakënaqur, por kjo mund të jetë fillimi i një procesi që mund të përfundojë më 2021”.